Leikurinn gegn Leipzig ekki í Þýskalandi

Óvissa er hvar útileikur RB Leipzig og Liverpoolí 16 liða úrslitum meistaradeildarinnar fer fram. Þýsk yfirvöld hafa bannað allar flugferðir frá Englandi til 17. febrúar og er það einkum til að hefta útbreiðslu breska afbrigðisins af kórónuveirunni. Leikurinn er fyrirhugaður 16. febrúar og því er ljóst að leikurinn fer ekki fram í Þýskalandi. Leipzig þarf því að vinna hratt til að finna nýjan leikstað.

Fyrst var reynt að fá sérstaka heimild fyrir Liverpoolliðið til að koma til Þýskalands í leikinn. Því hefur ríkislögreglan í Þýskalandi hafnað. Knattspyrnusamband Evrópu og RB Leipzig hafa verið í stöðugu sambandi og rætt ýmsar leiðir. Það að skipta á leikjum - þ.e. hafa fyrri leikinn á Anfield og þann seinni, sem á að vera 10. mars, í Þýskalandi - er þó ekki til skoðunar. Leipzig verður að finna nýjan leikstað því ef það tekst ekki telst Leipzog hafa gefið leikinn og Liverpool yrði þá dæmdur 3-0 sigur. Það gæti líka reynst flókið að finna stað sem heimilar flugferðir frá Bretlandi. Annar möguleiki væri að aðeins einn leikur yrði spilaður en ekki tveir.

Þetta er reyndar ekki í fyrsta sinn sem þessi staða kemur upp því á tímabili leit út fyrir að leikurinn gegn Midtjylland í riðlakeppni meistaradeildarinnar (sjá mynd) gæti ekki farið fram í Danmörku. Búið var að gera ráðstafanir til að flytja hann til Dortmund í Þýskalandi þegar Danirnir fengu heimild til að hafa leikinn.

Liverpool er ekki eina liðið í þessari stöðu, því í dag var tilkynnt að viðureign Arsenal og Benfica í 32 liða úrslitum Evrópudeildarinnar yrði aðeins einn leikur á hlutlausum velli.