Spáð í spilin

Næsti deildarleikur okkar manna er gegn Leeds United á útivelli. Leikurinn hefst klukkan 19:00 mánudagskvöldið 19. apríl.

Það eru rúmlega 17 ár síðan Liverpool spilaði síðast deildarleik á Elland Road. Þann 29. febrúar 2004 gerðu liðin 2-2 jafntefli og Leedsarar féllu svo úr deildinni þá um vorið. Þess má til gamans geta að James Milner var í byrjunarliði Leeds í þessum leik, þá nýlega orðinn 18 ára gamall.

Margir bjuggust við því fyrir tímabilið að Leeds myndi gera vel sem nýliðar í deildinni enda með spennandi lið og þrautreyndan knattspyrnustjóra. Liðið setti tóninn að einhverju leyti strax í fyrstu umferð á Anfield þegar þeir mættu óhræddir til leiks og náðu næstum því í stig en lokatölur voru 4-3 fyrir okkar mönnum í þrælskemmtilegum leik. Leeds hafa náð í 45 stig og sitja í 10. sæti fyrir þennan leik. Um síðustu helgi gerðu þeir sér lítið fyrir og sigruðu meistaraefnin í Manchester City á útivelli þrátt fyrir að leika manni færri allan síðari hálfleikinn. Það er því morgunljóst að mikið er í þetta lið spunnið, sóknarleikur liðsins er mjög góður og skemmtilegur en auðvitað kemur það einnig niður á varnarleiknum eins og gefur að skilja, markatalan er 49 mörk skoruð og jafnmörg fengin á sig. Leedsarar hafa unnið síðustu þrjá leiki sína í deildinni og ekki tapað í síðustu fjórum. Það er ekki mikið um meiðsli í leikmannahóp þeirra en Liam Cooper verður auðvitað í banni eftir rauða spjaldið um síðustu helgi og þeir Raphinha, Rodrigo og Adam Forshaw eru tæpir vegna smávægilegra meiðsla.

Sömu leikmenn og venjulega eru á meiðslalista Liverpool en nýjasta viðbótin er reyndar Divock Origi sem glímir við einhver vöðvameiðsl. Eins og í undanförnum leikjum velur byrjunarliðið sig að mestu leyti sjálft en spurningin er hvort að Diogo Jota byrji á kostnað einhverra hinna þriggja eða hreinlega hvort hann verði á miðjunni í frekar sóknarsinnaðri uppstillingu. Eins er afar líklegt að Thiago komi inn í liðið og þá væntanlega á kostnað James Milner. Ég er á því að sókn sé besta vörnin gegn Leeds og það þarf klárlega að nýta sér varnar veikleika liðsins. Ekki er samt ólíklegt að þeir hugsi það sama og að úr verði hin mesta skemmtun í kvöld, líkt og í fyrstu umferð.

Nú þurfa okkar menn að einbeita sér að þessum fáu leikjum sem eftir eru í deildinni og vinna baráttuna um að enda meðal efstu fjögurra liða deildarinnar. Það er nóg eftir af stigum í pottinum og tækifærið svo sannarlega til staðar til að halda áfram að klífa upp töfluna. Úrslit annara leikja hafa verið að falla með okkur undanfarið og liðið verður að nýta sér það. Fyrir höndum er samt ansi erfitt verkefni en spáin að þessu sinni er sú að það tekst að knýja fram sigur í skemmtilegum leik. Lokatölur verða 1-2 fyrir Liverpool.

Fróðleikur:

- Mohamed Salah er sem fyrr markahæstur í deildinni með 19 mörk.

- Patrick Bamford er markahæstur Leeds manna með 14 deildarmörk.