Spáð í spilin

Síðasti útileikur tímabilsins er gegn Burnley á Turf Moor og mikilvægi leiksins er öllum ljóst. Heimamenn hafa að engu að keppa en vilja líklega gefa stuðningsmönnum sínum alvöru leik. Leikurinn hefst klukkan 19:15 miðvikudaginn 19. maí.

Jürgen Klopp sagði á blaðamannafundi fyrir leik að ekkert nýtt væri að frétta af leikmönnum sem eru meiddir fyrir utan Alex Oxlade-Chamberlain sem hefur náð sér eftir veikindi og er tiltækur á ný. Það má því fastlega búast við lítið breyttu byrjunarliði en eins og venjulega eru það miðjumenn sem helst er róterað með. Gini Wijnaldum gæti byrjað á kostnað Curtis Jones en ég geri fastlega ráð fyrir því að Thiago og Fabinho byrji, þó það sé auðvitað smá möguleiki á því að sá fyrrnefndi fái smá hvíld eftir að hafa spilað mikið að undanförnu. Mikilvægi Thiago er hinsvegar óumdeilt og miðjan hefur verið betri eftir að hann komst í almennilegt leikform og lærði betur inná samherja sína. En við sjáum hvað setur. Burnley menn eru sem stendur með fimm leikmenn á meiðslalistanum og ber þar helst að nefna markvörðinn Nick Pope sem á smá möguleika á því að ná leiknum. Þeir Robbie Brady, Phillip Bardsley, Dale Stephens og Kevin Long eru allir fjarri góðu gamni.

Liverpool hafa spilað sex leiki við Burnley á Turf Moor í úrvalsdeild og aðeins tapað einum og unnið hina fimm leikina. Þrátt fyrir góð úrslit á þessum velli eru þetta alltaf mjög erfiðir leikir enda kann Sean Dyche, stjóri Burnley, þá list að stilla upp harðskeyttu liði sem lætur finna fyrir sér og spilar ekta enskan bolta með 4-4-2 þar sem a.m.k. einn kraft framherji er til að láta varnarmenn andstæðinganna finna fyrir sér. Síðast mættust liðin á þessum velli í ágúst árið 2019 og unnu okkar menn fínan 3-0 sigur, fyrsta markið var sjálfsmark og Mané og Firmino bættu svo við mörkum. Þegar liðin mættust á Anfield fyrr á tímabilinu var ekki hátt risið á okkar mönnum og leikurinn tapaðist 0-1, var þetta byrjunin á mikilli taphrinu á Anfield sem við viljum gleyma sem fyrst.

Það verða áhorfendur á vellinum í kvöld og það mun ábyggilega gefa Burnley mönnum aukinn kraft, eins og áður sagði hafa þeir ekki að neinu að keppa en eitthvað segir mér að Dyche muni ekki leiðast að leggja stein í götu Liverpool í keppninni um að komast í topp fjögur sætin í deildinni. Okkar menn þurfa að vera einbeittir á verkefnið og passa sig á því að láta ekki kraftakalla fótbolta heimamanna pirra sig um of. Auðvitað hefur maður smá áhyggjur af Rhys Williams og Nat Phillips í vörninni gegn svona stóru og sterku liði en sem betur fer eru þeir báðir hávaxnir og ágætir í því að verjast háum boltum.

Spáin að þessu sinni er sú að auðvitað er mikill spennu leikur fyrir höndum, enda erum við stuðningsmenn ekki vanir öðru en að Liverpool fari fjallabaksleiðina að settu markmiði. Lokatölur verða 1-2, ég geri ekki ráð fyrir eins mikilli dramatík og í síðasta leik enda höfum við mörg hver ekki hjarta í annað eins stress en stressið verður engu að síður nálægt hættulegum mörkum.

Fróðleikur:

- Mohamed Salah er sem fyrr markahæstur okkar manna með 22 mörk í deildinni og 31 alls á tímabilinu.

- Chris Wood er markahæstur Burnley manna í deildinni með 12 mörk það sem af er tímabils.

- Liverpool sitja í 5. sæti deildarinnar með 63 stig eftir 36 leiki.

- Burnley eru í 16. sæti með 39 stig eftir 36 leiki.