Metaregn í stórsigrinum á Old Trafford!

Mohamed Salah gerði það ekki endasleppt á sunnudaginn á móti Manchester United. Hann skoraði þrennu og setti fjögur met í leiknum. Reyndar féllu fleiri met.

Merkilegasta metið var að sigurinn var sá stærsti sem Liverpool hefur unnið á Old Trafford í allri sögu félagsins!

Mohamed Salah varð fyrstur leikmanna Liverpool til að skora í tíu leikjum í röð. Hann bætti met sem hann setti sjálfur í síðasta leik.

Enginn leikmaður frá Afríku hefur nú skorað fleiri mörk í efstu deild á Englandi. Mohamed Salah sló met sem Didier Drogba leikmaður Chelsea átti. Met Didier, sem er frá Fílabeinsströndinni, var 104 mörk. Egyptinn er nú búinn að skora 107 mörk. Í þriðja sæti er Senegalinn Sadio Mané með 100 mörk.  


Mohamed varð fyrstur leikmanna til að skora þrennu á Old Trafford í deildarleik á móti Manchester United frá því Úrvalsdeildin var stofnuð. 

Mohamed varð fyrsti leikmaður Liverpool til að skora þrennu á Old Trafford frá því Fred Howe gerði það í nóvember 1936. Liverpool vann þann leik 2:5.

Mohamed jafnaði félagsmet með því að skora í fimmta útileiknum í röð. Sam Raybould afrekaði þetta áður á keppnistímabilinu 1902/03.


Mohamed Salah skoraði í þriðja leiknum í röð á Old Trafford. Enginn leikmaður Liverpool hefur afrekað það áður. Mohamed skoraði tvö mörk í FA bikarnum þegar liðin mættust snemma á árinu og svo aftur í vor í deildarleik. 


Liverpool er fyrsta liðið í sögu ensku knattspyrnunnar til að skora þrjú mörk eða fleiri í níu leikjum í röð í öllum keppnum.

Þetta var 200. sigur Liverpool undir stjórn Jürgen Klopp. Hann náði 200. sigrinum í sínum 331. leik sem er félagsmet!