Spáð í spilin

Eftir að hafa tryggt sér sæti í úrslitaleik Deildarbikarsins með eftirminnilegum hætti er komið að deildinni. Englandsmeistarnir misstigu sig í dag og nú er að færa sér það í nyt. Ég hef þá trú að Liverpool geti orðið Englandsmeistari. Kannski langsótt en einhvern veginn finnst mér eins og allt sér ekki búið. En það þýðir að Liverpool verður að vinna svo til hvern einasta leik sem eftir er. Manchester City hefur borð fyrir báru og má við nokkrum misstigum. En hver veit?


Crystal Palace er með seiga leikmenn og gott lið á góðum degi. Roy Hodgson er sestur í helgan stein en síðasti leikur hans var einmitt á Anfield á síðasta leikdegi síðustu leiktíðar. Patrick Vieira er tekinn við. Liðið er kannski öðruvísi að einhverju en samt á svipuðum slóðum í deildinni. Það getur verið erfitt að brjóta liðið á bak aftur og Liverpool þarf örugglega að hafa fyrir sigri. En ef hægt á að vera að veita Manchester City keppni um titilinn þarf að finna leiðir til að vinna alla eða alla vega flesta leiki. 


Leikurinn við Arsenal var mjög erfiður og það er búin að vera stíf dagskrá það sem af er nýja árinu. Alex Oxlade-Chamberlain missti af leiknum við Arsenal en gæti verið leikfær á morgun. Annars er úr sömu leikmönnum að velja og fyrir leikinn á móti Arsenal. Reyndar fór Joël Matip af velli í hálfleik á fimmtudagskvöldið og kannski verður hann ekki til taks. 


Liverpool vann stórfenglegan 0:7 sigur í síðustu heimsókn sinni á Shelhurst Park. Sá leikur var rétt fyrir þarsíðustu jól og með honum komst Liverpool í góða stöðu á toppnum. Ég reikna alls ekki með slíkum stórsigri en ég spái því að Liverpool merji 1:2 sigur. Diogo Jota og Roberto Firmino skora. 

YNWA!