Spáð í spilin

Rauð viðvörun! Eltingaleikurinn við Manchester City heldur áfram. Það er kannski svolítið langsótt að Liverpool geti náð Englandsmeisturunum en það er ekki nein ástæða til að leggja árar í bát í því verkefni. Liverpool getur ekki annað gert en að reyna að vinna hvern einasta leik og vonast til að Manchester City misstigi sig. Reyndar er ekki einu sinni víst að það dugi Liverpool að vinna alla sína leiki. En miði er möguleiki!

Stormurinn Eunice hefur gengið yfir Bretlandseyjar með metvindhraða en leikurinn á samt að fara fram að öllu óbreyttu. Liverpool Football Club sendi frá sér yfirlýsingu í dag en í henni var fólk sem á miða á leikinn beðið að fara varlega og mætta í fyrra fallinu.


Liverpool vann frækilegan 0:2 sigur á Inter Milan á San Siro á miðvikudagskvöldið. Norwich mætir í heimsókn á Anfield morgun. Leeds kemur svo á sama stað á miðvikudaginn og svo er úrslitaleikurinn um Deildarbikarinn annan sunnudag. Það er sannarlega í mörg horn að líta fyrir leikmenn og þjálfaralið Liverpool. Þannig viljum við stuðningsmenn Liverpool hafa það því það þýðir að liðið er í baráttu um titla!


Þetta álag þýðir að Jürgen Klopp og ráðgjafar hans reyna að deila álagi á leikmenn Liverpool. Það má því búast við að einhverjar breytingar verði gerðar á liðinu frá síðasta leik. Eitt liggur fyrir í því og það er að einhver kemur inní byrjunarliðið í stað Diogo Jota sem er meiddur. Roberto Firmino gæti fengið sætið eða þá Luis Díaz. 


Liverpool hefur tvívegis unnið Norwich City það sem af er leiktíðar. Liðið hóf leiktíðina með 0:3 sigri á Carrow Road og svo endurtók liðið leikinn á sama stað í Deildarbikarnum í haust. Þá virtist Norwich ekki getað bjargað sér frá falli en liðið hefur braggast og er nú í þriðja neðsta sæti ekki langt á eftir liðunum fyrir ofan. Liðið er býsna seigt á góðum degi en Liverpool á og þarf að vinna sigur. Ég spái því að Liverpool vinni 3:1. Luis Díaz opnar markareikning sinn fyrir Liverpool og þeir Mohamed Salah og Sadio Mané skora líka. Eltingaleikurinn heldur áfram!

YNWA!