2-0 sigur

Liverpool tók á móti Watford í fyrsta leik 30. umferðar ensku úrvalsdeildarinnar. Heimamenn unnu góðan 2-0 sigur í frekar tíðindalitlum leik.

Sex breytingar voru gerðar frá síðasta leik sem var gegn Nottingham Forest og ekki laust við að manni fannst ansi langt síðan sá leikur var. Trent Alexander-Arnold var í nógu góðu standi til að vera í leikmannahópnum en hann settist á bekkinn. Mohamed Salah kom inní liðið á ný en svona var liðsskipan dagsins: Alisson, Gomez, Matip, Van Dijk, Robertson, Henderson, Jones, Thiago, Salah, Jota, Firmino. Varamenn: Kelleher, Konate, Oxlade-Chamberlain, Tsimikas, Diaz, Alexander-Arnold, Fabinho, Milner og Mané.

Leikurinn byrjaði rólega en gestirnir virtust vera beittar í sínum sóknaraðgerðum. Ismaila Sarr átti skot af nokkuð löngu færi sem fór yfir markið. Eftir hornspyrnu skömmu síðar náði Cucho Hernandez skalla að marki sem Alisson greip örugglega. Eftir u.þ.b. 20 mínútna leik fengu Watford menn svo fínt færi þegar Juraj Kucka skaut að marki en Alisson var vel á verði og bjargaði. Það var einhver rangstöðulykt af þessu færi en aðstoðardómarinn lyfti ekki flagginu og sennilega hefði þetta verið skoðað af myndbandsdómgæslu ef boltinn hefði endað í netinu. En það skipti litlu máli því örskömmu síðar voru okkar menn búnir að skora. Joe Gomez átti þá frábæra sendingu inná teiginn þar sem Diogo Jota mætti og sneiddi boltann snyrtilega með höfðinu í markið. Frábær sending hjá Gomez sem landi hans Alexander-Arnold hefði verið stoltur af.

Eftir þetta gerðist ekki mikið þannig séð en Jota komst í fínt færi vinstra megin í teignum en Ben Foster í markinu gerði sig breiðan og varði skotið vel. Staðan 1-0 í hálfleik og Liverpool menn virtust ekki almennilega hafa sett í gírinn.

Seinni hálfleikur var þó álíka rólegur og sá fyrri. Virgil van Dijk skallaði yfir markið eftir hornspyrnu frá Curtis Jones. Besta færi Watford manna kom svo þegar Sarr fékk sendingu innfyrir, lék inná teig vinstra megin og sendi boltann til hægri á Joao Pedro sem skaut föstu skoti en boltinn fór rétt framhjá. Hinumegin sendi Jordan Henderson fyrir markið úr aukaspyrnu og Jota var óvaldaður en skallaði boltann yfir. Fabinho og Mané komu inná fyrir Jones og Salah þegar rúmar 20 mínútur voru eftir og gestirnir virtust vilja bæta í sókn til að jafna metin. Fínt að fá Fabinho inná til að stöðva tilraunir þeirra með sinni alkunnu snilld á miðjunni. Brasilíumaðurinn var svo klár að taka vítaspyrnu undir lok leiks þegar myndbandsdómgæsla benti honum á glímubrögð Kucka á Jota. Örugg spyrna Fabinho söng í samskeytunum og 2-0 öruggum sigri var siglt heim.



Liverpool: Alisson, Gomez, Matip, van Dijk, Robertson, Jones (Fabinho, 62. mín.), Henderson, Thiago (Milner, 90. mín.), Salah (Mané, 69. mín.), Firmino, Jota. Ónotaðir varamenn: Kelleher, Konaté, Tsimikas, Alexander-Arnold, Oxlade-Chamberlain, Díaz.

Gult spjald: Gomez.

Mörk Liverpool: Diogo Jota (22. mín.) og Fabinho (89. mín.).

Watford: Foster, Femenía, Kabasele, Samir, Kamara, Louza (Cleverley, 78. mín.), Sarr, Sissoko, Kucka, Hernández (Dennis, 78. mín.), Joao Pedro (King, 78. mín.). Ónotaðir varamenn: Ngakia, Masina, Sema, Cathcart, Bachmann, Kayembe.

Gult spjald: Hernández.

Maður leiksins: Ætli það sé ekki öruggast að gefa Diogo Jota nafnbótina að þessu sinni. Portúgalinn hefur skorað slatta af mörkum á tímabilinu og mark hans í leiknum kom þeim rauðu á bragðið.

Jürgen Klopp: ,,Svona leikir geta farið hvernig sem er, ef við skorum snemma, mjög snemma, þá komumst við í rétt flæði og leikurinn gæti verið einstefna. En það er ólíklegt og sérstaklega eftir landsleikjahlé, þá sér maður yfirleitt ekki bestu leikina á tímabilinu. Við þurftum því að hafa fyrir hlutunum gegn mjög vel skipulögðu Watford liði."

Fróðleikur:

- Diogo Jota skoraði sitt 14. deildarmark á tímabilinu og það 20. í öllum keppnum.

- Fabinho skoraði sitt 5. deildarmark og það 7. í öllum keppnum.

- Eftir leiki laugardagsins eru okkar menn í öðru sæti deildarinnar með 72 stig.

- Watford sitja í 18. sæti með 22 stig.