Spáð í spilin

Nú er kominn tími á sigurleik hjá Liverpool eftir slaka byrjun á tímabilinu. Það ætti að vera frábært tækifæri til þess þegar nýliðar Bournemouth koma í heimsókn á Anfield laugardaginn 27. ágúst. Leikurinn hefst klukkan 14:00.

Því miður er það nú stundum þannig að vonir okkar stuðningsfólks um sigur fara ekki saman við niðurstöður leikja. En ef leikmenn Liverpool verða ekki dýrvitlausir frá fyrsta flauti þessa leiks, einbeittir á að ná í þrjú stig með öruggum sigri, þá er eitthvað mikið að.

Jürgen Klopp sat fyrir svörum á blaðamannafundi fyrr í dag og þar fór hann yfir málin. Hann byrjaði á því að segja að hann hefði engar áhyggjur af harkalegum samræðum James Milner og Virgil van Dijk inná vellinum gegn Manchester United. Liðið ræddi þessi mál, og fleiri í vikunni og engin vandamál eru tengd þessu atviki. Klopp sagði einnig að liðið sé ekki í þeirri stöðu sem þeir vilji vera í og nú þurfi enn meiri baráttu til að snúa hlutunum við, en það er eitthvað sem Klopp sagði sjálfur að honum líkar vel.

Hvað stöðu meiðsla varðar verður enginn af meiddu leikmönnunum klár gegn Bournemouth en Joel Matip, Curtis Jones og Thiago eiga ekki mjög langt eftir í sinni endurhæfingu. Diogo Jota er einnig á góðri leið og þá mun Caoimhin Kelleher hefja æfingar að nýju í næstu viku. En það er þó allavega gleðiefni að enginn meiddist í vikunni og þeir leikmenn sem voru í hópnum gegn United ættu allir að vera klárir. Hjá Bournemouth er líklegt að fyrrum leikmaður Liverpool, Dominic Solanke, komi við sögu á ný á tímabilinu en hann hefur náð sér af ökklameiðslum sem héldu honum frá síðustu tveim leikjum. Þá verða þeir Joe Rothwell, Ryan Fredericks, David Brooks og Junior Stanislas ekki með vegna meiðsla.

Liverpool og Bournemouth hafa mæst fimm sinnum á Anfield í deildarleik og þar hafa okkar menn sigrað fjóra leiki en einn endaði með jafntefli. Markatalan í þessum fimm leikum er 11-3. Suðurstrandarliðið féll úr deildinni árið 2020 en tókst að komast upp í vor eftir tveggja ára veru í næst efstu deild. Þar skoraði áðurnefndur Solanke grimmt fyrir þá og við vonum að hann verði ekki alveg kominn í leikform í þessum leik. Solanke fékk ekki mörg tækifæri hjá Liverpool á sínum tíma en hann hefur heldur betur fundið sig hjá nýju liði og gæti reynst þeim vel á tímabilinu. Nýliðarnir byrjuðu vel í fyrsta leik og sigruðu Aston Villa 2-0 á heimavelli en næstu tveir leikir hjá þeim töpuðust gegn Manchester City og Arsenal, samanlagt 0-7. Þeir eru því stigi fyrir ofan okkar menn í deildinni, sem er auðvitað glatað en breytist nú vonandi við þennan leik.

Spáin að þessu sinni er sú að nú rífa menn sig í gang og gott ef það næst ekki að halda hreinu líka. Lokatölur verða 2-0, kannski ekki eins stór sigur og við viljum en það eina sem skiptir máli er að fá þrjú stig, sama hvernig. Ég giska á að það muni reynast aðeins erfitt að brjóta Bournemouth á bak aftur og mörkin líta ekki dagsins ljós fyrr en í seinni hálfleik.

Fróðleikur:

- Mohamed Salah er markahæstur Liverpool manna í deildinni með tvö mörk.

- Hjá Bournemouth hafa þeir Lerma og Moore skorað mörkin í deildinni til þessa.

- Liverpool eru í 16. sæti deildarinnar með tvö stig eftir þrjá leiki.

- Bournemouth eru sæti ofar, í því 15. með þrjú stig eftir þrjá leiki einnig.

- Þeir Trent Alexander-Arnold og Andy Robertson gætu báðir spilað deildarleik númer 165 fyrir félagið.

- Alisson Becker spilar líklega sinn 140. deildarleik.

- Joe Gomez gæti spilað sinn 90. deildarleik og 145. leik í öllum keppnum.