Spáð í spilin

Liverpool hefur titil að verja í Deildarbikarnum og vörnin, eða þá sóknin að næsta titli í keppninni, hefst annað kvöld. Derby County kemur í heimsókn en þetta merka félag er nú í þriðju efstu deild. Liverpool ætti því að komast örugglega áfram í næstu umferð. En allir vita að allt getur gerst. Töp Liverpool fyrir Nottingham Forest og Leeds United á síðustu vikum segja allt sem segja þarf.


Liverpool hefur reyndar unnið tvo síðustu leiki eftir tapið fyrir Leeds United. Fyrst vann Liverpool Napoli á Anfield og svo Tottenham Hotspur í London um helgina. Í þeim leikjum stillti Liverpool upp sínu besta liði en það verður ekki svo á móti Derby. Væntanlega verða einhverjir aðalliðsmenn í liðinu en öruggt er að unglingar og leikmenn sem minna hafa leikið upp á síðkastið verða í meirihluta. Þannig hefur liði Liverpool verið stillt upp í fyrstu umferðum keppninnar síðustu árin. 


Stuðningsmenn Liverpool muna allir vel eftir Deildarbikarúrslitaleiknum á móti Chelsea á síðasta keppnistímabili. Ekki segja neinum aðdáanda Liverpool sem var á Wembley eða hvar sem var að þessi keppni skipti ekki máli. Auðvitað skiptir Deildarbikarinn máli og Liverpool á að spila til sigurs í hverri einustu keppni. Ferðalagið til Wembley og sigrarnir á leiðinni verða lengi í minnum hafðir. Hvað þá úrslitaleikurinn sem var frábær. Er einhver búinn að gleyma sigurmarki Caoimhin Kelleher í vítaspyrnukeppninni? Það er engin hætta á því.

Derby er sem fyrr segir í þriðju efstu deild. Liðið er sem stendur í sjöunda sæti. Félagið hefur átt í miklum erfiðleikum síðustu árin og féll niður í þessa deild í vor. Liverpool á því að vinna sigur annað kvöld. Deildarbikarmeistararnir vinna 4:1!

YNWA!