Spáð í spilin

Fyrri hálfleikur í undanúrslitarimmu Liverpool og Fulham verður leikinn á Anfield Road í kvöld. Gríðarlega mikilvægt er að leggja grunn að sæti í úrslitaleiknum með því að spila vel og vinna góðan sigur í þessum fyrri leik. Miðað við gengi liðanna  síðustu vikur ætti Liverpool að eiga nokkuð greiða leið til Wembley en ekkert er fast í hendi enda um bikarkeppni að ræða.


Þetta verður í þriðja sinn sem Liverpool leikur í undanúrslitum Deildarbikarsins á valdatíð Jürgen Klopp.  Liverpool hefur tvisvar komist í úrslit í þessum þremur rimmum en einu sinni fallið úr leik. Allir stuðningsmenn Liverpool muna eftir því þegar Liverpool vann Deildarbikarinn á leiktíðinni 2021/22. Eftir markalausan leik á Anfield gegn Arsenal í fyrri undanúrslitaleik liðanna vann Liverpool frækinn sigur í London. Liverpool vann svo bikarinn á Wembley eftir ótrúlega vítaspyrnukeppni við Chelsea. Þó svo sumir geri lítið úr Deildarbikarnum þá er ekki vafi á því að það skiptir miklu að vinna keppnina. En til að vinna hana þarf að takast vel til í kvöld. 


Sem fyrr segir er mótherjinn Fulham. Lundúnaliðið er rétt fyrir neðan miðja deild en er erfiður mótherji. Stuðningsmönnum Liverpool er í fersku minni þegar liðin mættust á Anfield fyrir nokkrum vikum. Liverpool marði þá 4:3 sigur í frábærum leik. Það verður því erfitt að ryðja liðinu úr vegi. Þetta er önnur umferðin í röð sem Fulham leikur í Liverpool. Í átta liða úrslitunum lék Fulham við Everton á Mersey bökkum. Liðin skildu jöfn 1:1 en Fulham vann í vítaspyrnukeppni. 


Það eru býsna margir leikmenn Liverpool úr leik núna. Alls tíu ef allir aðalliðsmenn eru taldir. Af þeim tíu má nefna Trent Alexander-Arnold, Andrew Robertson, Kostas Tsimikas, Mohamed Salah, Wataru Endo og  Dominik Szoboszlai. Virgil van Dijk er sem betur fer leikfær eftir að hafa verið veikur á sunnudaginn. Ljóst er að Caoimhin Kelleher verður í markinu eins og hingað til í keppninni. Annað um uppstillingu er svo sem óljóst. Það varður þó að reikna með því að Liverpool sendi sitt sterkasta lið til leiks því sæti í úrslitaleik á Wembley er í húfi. 

Ég spái því að Liverpool spili vel og vinni 2:0. Diogo Jota og Cody Gakpo skora mörkin. Minni má forystan ekki vera fyrir seinni leik liðanna í London. 

YNWA!