Af kvennaliðinu

Nú er landsleikjahlé í efstu deild kvenna á Englandi og víðar. Þá gefst gott tækifæri til að líta á stöðu mála hjá kvennaliði Liverpool.

Liverpool hefur spilað fimm deildarleiki frá því staða mála var skoðuð síðast. Seinni partinn í febrúar vann Liverpool útisigur 0:1 í Brighton. Ceri Holland skoraði markið. Fyrsti leikurinn í mars var líka útileikur og nú vann Liverpool góðan sigur á Aston Villa 1:4. Annar sterkur sigur vannst í næsta leik. Liverpool vann þá West Ham United 3:1  á heimavelli. 

Næst á dagskrá var grannaslagur við Everton á Goodison Park. Ekkert mark var skorað í hörkuleik. Rúmlega 9.000 áhorfendur komu á leikinn. Í síðasta leik fyrir landsleikjahlé fór illa. Liverpool fékk Manchester City í heimsókn. Toppliðið vann öruggan sigur 1:4.

Sem stendur leiðir Manchester City deildina með 46 stig. Chelsea er þremur stigum á eftir en á leik til góða. Liverpool er í fimmta sæti með 29 stig eftir 18 leiki. Í deildinni eru 12 lið. Fjórar umferðir eru eftir. 

Liverpool féll úr FA bikarnum fyrir Leicester City. Refirnir unnu kannski frekar óvæntan sigur 0:2 í Liverpool. Þar með lauk bikarkeppnunum hjá Liverpool á leiktíðinni.   

Í sambandi við bikarkeppnir má nefna að Arsenal vann, um daginn, Deildarbikarinn. Liðið lagði Chelsea að velli í úrslitum 1:0.