Maxi getur ekki beðið

Hinn nýi vængmaður Liverpool, Maxi Rodriguez, hefur sett sér það takmark að aðlagast nýju umhverfi fljótt. Argentínumaðurinn kom á Anfield á miðvikudag á frjálsri sölu frá Atletico Madrid og skrifaði hann undir 18 mánaða samning við Liverpool. Hann hefur strax hafið enskunám en eftir að hafa varið tíma sínum mestmegnis á tréverkinu að undanförnu, klæjar hann í fingurna að hefja leik með nýju liði.

"Þetta eru mjög góð vistaskipti fyrir feril minn og ég er mjög ánægður með að komast til liðs eins og Liverpool," sagði hann í viðtali á opinberri heimasíðu liðsins.

"Helsta takmark mitt er að aðlagast, komast í takt við leik liðsins, hjálpa því og öðrum leikmönnum og fá að spila leiki. Það er heiður fyrir hvaða leikmann sem er að klæða sig í Liverpooltreyjuna og ég vil gera það sem fyrst. Ég hlakka til árangursríks tíma hér og vil hjálpa Liverpool til að bæta þá stöðu sem liðið er í og gera mitt allra besta. Að sjálfsögðu verður það mikil áskorun en ég held að það muni ekki taka mig langan tíma að aðlagast. Ég mun spila á háu tempói og ég vona að sá hraði sem ég leik á muni henta Liverpool."

"Ég er einnig að vonast til þess að ná að læra ensku og ég reyndi að læra eitthvað áður en ég kom hingað.
Ég er tilbúinn til þess að setja mig inn í hluta og sýna allar mínar bestu hliðar bæði félagslega og knattspyrnulega."

Rodriguez, sem hefur skorað 10 mörk í 35 landsleikjum, finnst ekki að fáir leikir hans fyrir Atletico á leiktíðinni sé vandamál og vonast til þess að verða í hópnum gegn Stoke um helgina.

"Ég hef ekki spilað marga leiki og ég missti alveg af síðustu leikjum vegna áhuga Liverpool, en ég hef verið að æfa þannig að ég er í góðu formi og vonast til þess að fara beint í hópinn."

Rodriguez hittir fyrir landa sinn og félaga úr landsliðinu, Javier Mascherano, og fyrrum liðsfélaga hjá Atletico, Fernando Torres. Hann er mjög spenntur fyrir því að leika með þeim að nýju.

"Það hefur alltaf verið mikil ánægja að deila búningsherbergi með þessum drengjum og spila með þeim.
Það er frábært að fá tækifæri til þess að komast aftur inn í líf þeirra og spila knattspyrnu með þeim."