Kuyt vill ólmur spila gegn Utrecht

Roy Hodgson mun örugglega stilla upp hálfgerðu varaliði gegn Utrecht í Evrópudeildinni á miðvikudag, enda Liverpool búið að tryggja sér sigur í riðlinum. Dirk Kuyt vill þó ólmur taka þátt í leiknum.
Það er skiljanlegt að Kuyt vilji spila gegn Utrecht, en Hollendingurinn hóf farsælan atvinnumannsferill sinn með Utrecht árið 1998 og spilaði með liðinu í 5 ár áður en hann var seldur til Feyenoord. 

,,Ég er þannig leikmaður að ég vil helst spila hvern einasta leik. Ég hef misst marga leiki úr á þessu tímabili þannig að mér veitir ekki af því að spila, en þar fyrir utan væri auðvitað mjög gaman að mæata mínum gömlu félögum í Utrecht", segir Kuyt.

,,Ég á góðar minningar frá Utrecht og ég á ennþá marga góða vini hjá liðinu. Fólk sem ég er enn í ágætu sambandi við. Það væri gaman að spila á móti mínum gömlu félögum hér á Anfield."

Liverpool er þegar búið að tryggja sér sigur í riðlinum þannig að það er viðbúið að Roy Hodgson muni hvíla marga af lykilmönnum liðsins á miðvikudaginn. Dirk Kuyt vonast þó til að sleppa við hvíldina.