Stóðum okkur vel

Það eru 2.361 dagar síðan Lucas Leiva skoraði síðast fyrir Liverpool en Brasilímaðurinn var auðvitað ánægður með sigurmarkið sitt gegn Plymouth sem og frammistöðu liðsins í heildina.

Það var vel við hæfi að elsti leikmaður liðsins í þessum leik skyldi skora eina markið en eins og í fyrri leiknum stillti Jurgen Klopp upp ungu liði gegn Plymouth.

,,Þetta var erfitt kvöld og við bjuggumst við því.  Þeir eru með líkamlega sterkt lið og við vorum með marga unga leikmenn," sagði Lucas í viðtali við opinbera heimasíðu félagsins.

,,Aðalmarkmiðið var að komast áfram í næstu umferð sem og að gefa þessum ungu leikmönnum meiri reynslu og við náðum því.  Ef maður horfir á leikinn aftur má auðvitað sjá að við getum bætt fullt af hlutum og þá sérstaklega hvað þolinmæði varðar þegar við erum með boltann."

,,En það er ekkert óeðlilegt við það, eins og ég sagði þá erum við komnir í næstu umferð og vonandi eigum við góðan leik gegn Úlfunum.  Þetta er einmitt það skemmtilega við FA bikarinn, það er mikið af óvæntum úrslitum og fólk bjóst ábyggilega alveg við því vegna þess að við náðum ekki að vinna Plymouth á Anfield."

,,Ég verð að hrósa Plymouth, þeir gerðu okkur erfitt fyrir og stuðningsmenn þeirra voru frábærir í að hvetja sitt lið áfram.  En ég held að við höfum gert vel í að halda þeim eitthvað niðri.  Þeir áttu sínar stundir í leiknum en þegar upp var staðið áttum við sigurinn skilinn."

Eins og áður sagði er ansi langt síðan að Lucas skoraði síðast en það var nánar tiltekið þann 16. september árið 2010 í Evrópudeildinni gegn Steaua Búkarest.  Ísinn var brotinn á 19. mínútu leiksins þegar hann skallaði hornspyrnu frá Coutinho í markið við mikinn fögnuð.

Hann bætir við:  ,,Það er vissulega langt síðan ég skoraði síðast.  Aðalatriðið var að hjálpa liðinu auðvitað en það er auðvitað alltaf gott að skora mörk, sérstaklega fyrir mig.  Vonandi get ég náð nokkrum í viðbót."

Liðið er nú enn með í öllum keppnum sem það tekur þátt í á þessu tímabili en Lucas fer varlega í að spá liðinu einhverjum bikarsigrum enn sem komið er.

,,Ég held að liðið sé að sýna mikinn andlegan styrk, við erum með marga unga leikmenn og erum að gera vel í öllum keppnum.  Vonandi komumst við í úrslit í bikarkeppnunum tveimur og í deildinni höldum við áfram að gera okkar besta og við höfum sýnt að við getum áfram keppt þar."

,,Það er alltaf erfitt að segja í janúar hvort við munum vinna eitthvað.  Við tökum bara einn leik í einu, njótum og gerum okkar besta."