Spáð í spilin

Grannliðin í Liverpool leiða saman hesta sína á morgun. Í fyrsta skipti í sögunni leika Liverpool og Everton fyrir tómum áhorfendastæðum á Anfield Road. Það verður undarlegt svo ekki sé meira sagt. Liðin hafa auðvitað tvívegis spilað á Goodison Park eftir að áhorfendur hurfu vegna heimsfaraldursins. Reyndar eru tóm áhorfendastæðin orðin venjulegt ástand og það er ekki nein breyting í sjónmáli hvað það varðar. 

Liverpool og Everton eru nú bæði í toppbaráttu. Það er að segja baráttu um fjögur efstu sæti deildarinnar. Jürgen Klopp hefur meira að segja lýst því yfir að Englandsmeistaratitillinn sé úr sögunni. Manchester City er nú í lykilstöðu í toppsætinu. En bæði Liverpool og Everton eiga alla möguleika á að ná einu af fjórum efstu sætunum.

Eins og er eru aðeins þrjú stig á milli liðanna. Liverpool er í sjötta sæti og Everton í sjöunda. Liðin eru sem sagt sem stendur utan Evrópusæta. Ljóst er að baráttan um þessi sæti verður bæði jöfn og hörð. Ekkert má út af bera í þeim leikjum sem eftir eru. 


Leikur liðanna á Goodison Park í haust dró dilk á eftir sér. Tveir leikmenn Liverpool meiddust illa og annar ekki ennþá orðinn leikfær. Það þýðir ekki að fást um það en eftir stendur að meiðsli Virgil van Dijk voru afdrifarík svo ekki sé fastar að orði kveðið. Til að bæta gráu ofan á svart var löglegt sigurmark tekið af Liverpool á síðustu mínútu leiksins og leiknum lauk 2:2. 

Liverpool má einfaldlega ekki tapa á morgun og verða að vinna. Englandsmeistararnir hafa tapað tveimur síðustu deildarleikjum og að auki tveimur síðustu leikjum á Anfield. Slíkt er í raun óhugsandi en gerðist samt. Eftir sigurinn í Ungverjalandi ætti að vera komið sjálfstraust í menn.


Þegar liðin mættust á Anfield á síðustu leiktíð burstaði Liverpool Everton 5:2 og hefði átt að vinna enn stærri sigur. Í kjölfar þeirrar niðurlægingar tók Carlo Ancelotti við Everton og þeir Bláu eru mun betri en fyrir rúmu ári. Ég spái því samt að Liverpool vinni á morgun. Mohamed Salah og Sadio Mané skora í 2:0 sigri. Annað en sigur dugar ekki!

YNWA!